Törek yäşüsmeren üterüçegä - 25 yıl

Pol’şada üze uqığan mäktäptä pıçaq qadap 16 yäş’lek Yakup Kızıltaşnı üterüçene 25 yıl törmägä xökem ittelär.

Törkiyäneñ Varşava ilçelegennän alınğan mäğ’lümatlarğa qarağanda, 2019nçı yılda bulğan cinayät’neñ mäxkämä utırışında Kızıltaşnıñ ätise häm ğayepleneñ ğailäse qatnaşa. Anda üterüçe Êmil’ B.nıñ narkoman bulmawı häm cinayät’ne belä torıp başqaruı äytelä. Üze ul ğayeben tanıy häm Yakup Kızıltaşnıñ ätisennän ğafu ütenä. Monıñ tışında ğayeplänüçeneñ xökem qararın ciñeläytüçe säbäp tabılmağan.

Mäxkämä Êmil’ B.nı 18 yäşennän keçelär öçen Pol’şa qanunnarı nigezendä iñ yuğarı cäza – 25 yılğa iregennän mäxrüm itü turında qarar çığardı. Monnan tış, ul Kızıltaşnıñ ätisenä 23 meñ yevro, ir tuğanına – 12 meñ yevro kompensaśiyä tülärgä tiyeş.