Bağdadtağı şartlawlar öçen DEAŞnı cawaplı totalar

Ğıyraqnıñ başqalası Bağdadta kiçä 32 keşeneñ ğomeren özgän terrorçılıq höcüme öçen cawaplılıqnı DEAŞ üz östenä aldı.

Monnan alda Ğıyraq êçke êşlär ministrı wäkile Xalid Mixanna, başqala Bağdadtağı şartlawnıñ artında älege terrorçı oyışma toruın citkergän ide. Ul cirle ber telekanalğa interv’yuda bazarda bulğan waqıyğa xaqında bolay dip söyläde: “Şartlawnıñ artında, monı üz östenä almasa da, DEAŞ tora. Monıñ belän terrorçı oyışma üzeneñ äle dä barlığın kürsätergä teläde”.

Älege waqıyğadan soñ Ğıyraqta xärbi häm iminlek kadrlarında ähämiyätle üzgäreşlär yasaldı.

Höcümnän soñ xökümät räise Mostafa äl-Kazımi qurqınıçsızlıqnıñ zäğıyf’ buluın äytte häm başqalanıñ iminlege öçen cawaplı Bağdad operaśiyälär komandirı Kays Möxämmädavinı wazıyfasınnan aldı. Anıñ urınına general Äxmät Sälim quyıldı.

Bağdad operaśiyälär komandalığındağı wazıyfasınnan çitläşterelgän tağın ber wäqalätle isä küzläw häm iminlek êşläre öçen cawaplı general Basim Välid buldı.

Xökümät räise Kazımi êçke êşlär ministrlığına bäyle poliśiyä idaräse räise Cafär Battatnıñ urınına Raid Şakir Cäwdätne bilgeläde.  

Êçke êşlär ministrlığınıñ küzläw êşläre öçen cawaplı wäkillege citäkçelegenä Äxmät Abu Regif quyıldı.

Kiçä Ğıyraqnıñ başqalası Bağdadnıñ üzäge Tayaran mäydanında qullanılğan äyber häm kiyem-salım satıla torğan bazarda ber-ber artlı ike bomba şartladı. Alar üz-üzlären şartlatuçılarğa berketelgän bulğan.

Ğıyraq iminlek xezmätläre höcümdä 32 keşeneñ ğomere özelüen, 110 keşeneñ isä yaralanuın belderde.