Biontex/Pfayzer vakśinası - mutantqa qarşı

Biontex/Pfayzer vakśinası koronavirusnıñ mutaśiyä kiçerep tağın da tiz taraluçı törenä qarşı da täêsirle buldı.

Amerikanıñ daru şirkäte Pfayzerdan yasalğan belderüdä äytelgänçä,  Texas universitetı mediśina fakul’tetı belän bergä alıp barılğan laboratoriya testlarında şul kürenä: virusnıñ keşe küzänäklärenä totınuın täêmin itkän “ênä proteinında” barlıqqa kilgän üzgäreş vakśina yoğıntısına bireşä.

Vakśinalaştırılğan 20 keşedän alınğan qan ürnäkläre belän ütkärelgän täcribälärdä virusqa qarşı toruçı antitänçeklärneñ yaña mutantnı täêsirsez xälgä kiterüe kürende.

Tikşerenüdä Kovid-19nıñ 15 törle mutaśiyäse qarala. Hiç bersendä vakśinanıñ täêsire belän bäyle tiskäre küreneş oçramadı.  

Angliyä häm Kön’yaq Afrikada päyda bulğan N501Y iseme birelgän mutaśiyä virusnıñ ênä proteinınıñ ber noqtasında kilep çıqqan üzgäreştän ğıybarät. Ul virusnıñ organizmğa tağın da caylı totınuın täêmin itä häm şunıñ belän yoğışlılığın arttıra dip farazlana.  

Pfayzer fän operaśiyäläre yuğarı idaräçese Filip Dormitśer virustağı üzgäreşlärneñ vakśina belän üzara yoğıntısın tikşerüneñ däwam itäçägen belderde. Ul viruslarnıñ mutaśiyäsenä bäyle bularaq vakśina formulalarında da üzgäreş yasaw mömkinlegenä iğ’tibarnı cälep itte. Ribonuklein kislota nigezle vakśinada virusnıñ genetik kodın üzgärtep preparat mutaśiyälärgä qarşı kisätelä ala.

Virusnıñ Kön’yaq Afrikada päyda bulğan E484K mutaśiyäse ğalimnärne borçuğa sala. Ul Pfayzernıñ êşçänleklärendä urın almadı. Mutaśiyä ênä proteinında yaña üzgäreşlärgä yul aça.