Şartlatuçı üz-üzenä qul salğan

AQŞnıñ Tennesi ştatı Nêşvill şähärendä Raştua irtäsendä bulğan şartlawnıñ şöbhälese - 63 yäş’lek Êntoni Kuinn Uorner.

Tennesi prokurorı Don Kokran matbuğat cıyılışında bolay dide: “Êntoni Uorner isemle şäxesneñ üz-üzen şartlatuı näticäsenä kildek. Şartlaw waqıtında ul anda ide häm kükkä oçtı”.

Tikşerüne alıp baruçı federal’ wäqalätle Dêvid Rauş isä şartlaw bulğan mäydandağı keşe qaldıqlarınıñ DNK testı yasaluın häm alarnıñ Uornernıqı buluı açıqlanuın belderde.

Ul şähär üzägenä quyılğan karawan törendäge maşinada üz-üzen şartlata. Wäqalätlelär Uornernıñ bu êşne yalğız başqaruın sanıy. Älege ğamäleneñ säbäpläre isä bilgele tügel.

Şartlawda 3 keşe yaralandı, alarnıñ tormışlarına berni yanamıy. Monnan tış, şähärdä kimendä 41 binağa zarar kilä.