Angliyada Kovid-19nıñ mutantı tabıldı
Älege Kovid-19 mutaśiyäseneñ tağın da tizräk taraluı turında xäbärlär çıqqan ide.
Bötendön’ya sälamätlek saqlaw oyışması Angliyäneñ kön’yaq-könçığışında açıqlanğan koronavirusnıñ yaña töreneñ moña qadärgelärennän ayırılıp tormawın belderde. Älege Kovid-19 mutaśiyäseneñ tağın da tizräk taraluı turında xäbärlär çıqqan ide.
Bötendön’ya sälamätlek saqlaw oyışmasınıñ ğadättän tış xällär programması mödire Mayk Rayan Şveyśariyäneñ Jeneva şähärendäge üzäktä älege mäs’älä belän bäyle sorawlarğa cawap birde. “Bu genetik variant xaqında beläbez,”-dide ul. Rayan Angliyädä belgeçlärneñ yaña törne tikşerüen äytte.
“Kovid-19nıñ bik küp variantın kürdek. Bu virus waqıt ütkän sayın üsä häm üzgärä,”-di BSO wäkile.
Oyışmanıñ Kovid-19 belän köräş törkeme liderı Maria Van Kerxove isä Angliyädäge wäqalätlelärdän alğan soñğı mäğ’lümat belän urtaqlaştı. “Xäzergä qadär bu variantnıñ başqa törle buluına bernindi dälil tabılmağan. Ämma, älbättä, monı döres bäyäläw öçen saqlıq belän êşlibez,”-di ul.
Kerxove citkergänçä, belgeçlär, Kovid-19nıñ barlıq törlärendäge şikelle ük, yaña açıqlanğan tördä dä antitänçeklär barlıqqa kilüdä berär nindi üzgäreş barmı, yuqmı – şunı tikşerä.
