Cir qara tişekkä tağın da yaqın

Cirneñ Kiyek qaz yulı galaktikası üzägendäge supermassalı qara tişekkä uylanğannan tağın da yaqınraq buluı açıqlandı.

CNN xäbärenä qarağanda, Yaponiyä milli astronomiyä observatoriyäsendäge ğalimnär galaktikanıñ yaña kartasın çığardı. Anda qara tişekneñ Cirgä 25 meñ 800 yaqtılıq yılı yıraqlığında buluı kürenä. Xalıqara astronomiyä berlege 1985nçe yılda bu aranı 27 meñ 700 yaqtılıq yılı dip qabul itkän ide.

Yaponnarnıñ yaña kartasına qarasaq, Qoyaş sisteması galaktika üzäge tiräsendä äylängändä sekundına 227 çaqrım yul ütä. Moña qadär älege tizlek sekundına 220 çaqrım bularaq uylanıla ide.

Yaña karta Yaponiyä astronomiyä proyektı VERAnıñ 15 yıllıq küzätüläre qısasında xäzerlängän.

Kiyek Qaz yulı galaktikasınıñ üzägendäge Sagittarius A qara tişegeneñ massası Qoyaşnıqınnan 4 million 200 meñ tapqır zurraq dip uylanıla.