Makronnı üz ilendä dä tänqıyt'lilär

Franśiyädä êlekkege ilbaşı kandidatı, çiktän tış sulçı xäräkät “Başın imäwçe Franśiyä”nıñ liderı häm deputat Jan-Lyuk Melanşon däwlät başlığı Êmmanuêl’ Makronnı Törkiyä ilbaşı Räcäp Tayyip Ärdoğan belän barğan tartqalaşuında yaqlamayaçağın belderde. Ul “Frans İnter” radiosına interv’yusında bu oçraqta süzsez qalırğa uylawın äytte. “Makron wäzğıyät’neñ kontrolen tulısınça yuğalttı,”-dide Melenşon.  Ul ilbaşınıñ xäzer teläktäşlek soraw urınına, strategiyäseneñ närsä bulaçağın uylarğa tiyeşlegen citkerä. “Franśiyä mäsxärägä qaldı, Makron twit yazu tışında närsä êşlärgä planlaştıra?”-dip sorıy çiktän tış sulçı lider.

Franśiyädä 16nçı oktyabr’dä Möxämmät päyğambärne mısqıllawçı karikaturanı därestä uquçılarına kürsätkän ber uqıtuçı başı kiselep üterelgännän soñ Makron İslam häm möselmannarğa qarşı belderülär yasadı häm karikaturalarnıñ binalarnıñ divarlarında çağıldıru qararı çığardı. Anıñ bu adımnarı İslam dön’yasında rizasızlıq häm protestlarğa kiterde. Katar, Kuveyt, Aljir, Sudan, Fälästin häm Marokko şikelle bik küp däwlättä Franśiyä tovarlarına boykot belderdelär.

Törkiyä ilbaşı Räcäp Tayyip Ärdoğan da kiçä: “Franśiyä törek markalı tovar satıp almağız digän şikelle, min dä üz millätemä möräcäğat’ itäm. Franśuz markaların maqtamağız häm alarnı satıp almağız,”-dip boykotka çaqırdı.