12 yäş'lek bala 69 million yıllıq dinozavr fosile taptı

Kanadanıñ Al’berta töbägendä 12 yäş’lek bala 69 million yıllıq dinozavr qaldıqları taptı. Natan Xruşkin isemle malay ätise belän tabiğat’ qoçağında yörergä çıqqan bula. Şunda bala cirdän çığıp toruçı söyäklär kürep ala. Älege mizgelne Natan BBC kanalına bolay dip añlata: “Şulqadär şaqqattım, xätta söyenä dä almadım”.

Malay 6 yäşennän birle dinozavrlar belän qızıqsına. Ätise belän yış qına Al’bertadağı Kanada tabiğat’ne saqlaw mäydanında yörilär. Biredä êlek tä dinozavr söyäkläre çıqqalağan.

“Dinozavrlarnıñ bezneke şikelle söyäkläreneñ taşqa äwerelüe mine gel qızıqsındıra ide,”-di Natan.

Ätile-uğıllı Xruşkinnar söyäkne tapqannan soñ aña qağılmıy. Çönki fosil tabılğan cirennän çığarılsa – bik küp mäğ’lümat yuğala. Monnan tış, älege mäydan qanun belän saqlana. Alar söyäkne fotoğa töşerä häm geolokaśiyäne bilgeläp, arxeologiya muzeyena xäbär birä.

Tabıldıqnıñ 3-4 yäş’lek gadrozavr qaldıqları buluı açıqlana. Qazınu êşçänlege barışında 30 belän 50 arasında söyäk öleşe barlığı kürenä.  

Äti keşe äytüençä, alar mondıy zur skelet tabu turında xıyallanmağannar da. “Bez bälki ber teş yäisä başqa keçkenä söyäk kisägenä yulığırbız dip ömetländek. Natannı geologiya belän qızıqsındırırğa telädem,”-di ul.

Aylar buyı däwam itkän êşçänlektän soñ pänceşämbe könne taşqa äwerelgän söyäklärne çığarğannar. Alarnı maxsus gips sawıtlarğa quyıp laboratoriyägä alıp kitälär. Muzey wäkilläre ul çorğa qarawçı tabıldıqlarnıñ bik oçramawın häm bu dinozavr söyäkläreneñ fän öçen ähämiyätle buluın söyli.