Misırda tağın 13 mäxkümneñ ülem cäzası başqarıldı

Misırda  tağın 13 säyäsi mäxkümneñ ülem cäzası tormışqa aşırıldı.

Bu xaqta Möselman qardäşlär oyışmasına yaqınlığı belän bilgele häm il tışında êşläwçe “Vatan” telekanalınıñ Feysbuk akkauntında yazıldı. Anda ülem cäzası başqarılğan keşelärneñ isemnäre dä äytelä.

Säyäsi mäxkümnärneñ üterelüe turında, monnan tış, Misır tışında êşläwçe “Mükemmilin” häm “Şark” şikelle törle oppoziśiyä törkemnärenä qarawçı telekanallar da citkerde.

“Şark” kanalı ülem cäzasına tartılğan 13 keşe turında mäğ’lümat urtaqlaştı häm tuğannarı, yaqınnarınıñ mäyetlärne alu öçen başqala Kahirädäge Zinhum xastaxanäse morgına baruların soradı.

Misır räsmi dairälärennän alege waqıyğa belän bäyle belderü yasalmadı.

İldä 2013nçe yılda bulğan xärbi tüntäreleştän birle törle ğayepläwlär belän xökem itelgän distälägän keşeneñ ülem cäzası tormışqa aşırıldı.