Êkvadorlı par Ginnesnıñ rekordlar kitabında

Êkvadorda yäşäwçe Xulio Mora häm Val’dramina Kinteros kiläse yılğa öyläneşüläreneñ 80 yıllığın bilgeläp ütäçäk. Alar dön’yadağı iñ qart par bularaq Ginnesnıñ rekordlar kitabına kertelde.

Xulio Mora 1910nçı yılda tuğan, xatını – 1915tä. Alar ikese dä pensiyädäge uqıtuçılar. Yeget belän qız 1934nçe yılda tanışqan. Ä 1941nçe yılda, ğailäläreneñ qarşı buluına qaramastan, yäşeren räweştä öyläneşälär. Val’dramina Kinteros beldergänçä, ir belän xatın berqayçan da ayırılmağan häm ayırılışu turında uylamağan.  

Ölkän yäş’täge parnıñ sälamätlege yaxşı. Alarnıñ 4 balası, 11 onığı, 21 onıqçığı häm 1 onıqçıq balası bar.

Rekordlar kitabında tağın da ozın nikyaxlarnıñ barlığı äytelä, ämma bu qadär qart keşelär arasında tügel.