Êvo Moralesnı qulğa alu qararı çığarıldı

Boliviyäneñ êlekkege däwlät başlığı Êvo Moralesnı qulğa alu qararı çığarıldı. Annan fetnä, terrorçılıq häm terrorçılarğa finans yärdäm itüdä şöbhälänep tiklerü alıp barıla ide.

Boliviyä matbuğatında çıqqan xäbärlärgä qarağanda, Êvo Moralesnıñ 2019nçı yılnıñ 12nçe noyabrennän 17senä qadär koka citeşterüçe Faustino Yukra Yarvi belän kimendä 2 tapqır oçraşuı açıqlana.

Morales üze Twitter aşa yasağan belderüendä Yarvi belän telefon aşa ğına söyläşüen citkerde häm ğayepläwlärne kire qağıp, alarnı “säyäsi basım” bularaq bäyäläde.

Bilgele bulğança, Morales armiyä häm oppoziśiyäneñ basımı astında wazıyfasınnan kitärgä mäcbür buldı. Şunnan soñ il belän idarä itügä kereşkän waqıtlıça xökümätneñ ministrı Arturo Murillo anıñ narkotik citeşterüçe belän telefon aşa söyläşüen dälilläwçe videonı cämäğat’çelekkä çığardı. Anda Moralesnıñ Yarviğa ilneñ törle töbäklärenä yağulıq häm azıq-tölek ireşterügä qomaçawlaw, monnan tış, waqıtlıça däwlät başlığı Janin An’yes xökümätenä barrikadalar qorıp fizik qarşılıq kürsätü ämere birüe äytelä.