Könbatışta koronavirus - sannar qabat öskä taba sikerde

Dön’yada koronavirustan ğomere özelüçelär sanı 456 meñ 720dän arttı. Yoqtıru oçraqları 8 million 599 meñnän, sawığuçılar isä 4 million 549 meñnän kübräk.

Amerika Quşma ştatlarında kizüdä 120 meñ keşe ülde. Koronavirus belän köräş çaraları yomşarğannan soñ Texas, Florida häm Arizonadan başlap 20dän artıq ştatta yaña yoqtıru oçraqları rekord däräcägä citte. İldä Kovid-19 diagnozı tulayım 2 million 225 meñ keşegä quyıldı.

Kizüdän iñ küp zarar kürgän ikençe däwlät Braziliyädä virus säbäple soñğı täwlektä 1238 keşeneñ ğomere özelde. Şulay itep tulayım yuğaltu 47 meñ 748 buldı. Yortıru oçraqları ber köndä 22 meñ 765kä arttı häm 978 meñ 142gä citte.

İtaliyada Kovid-19 säbäple ğomere özelüçelärneñ sanı soñğı köndä 66ğa arttı häm 34 meñ 514kä citte. Şul uq waqıtta 333 yaña oçraq terkälde. Awıruçılar sanı 824kä kimede.  

Franśiyädä kizü arqasında soñğı täwlektä xastaxanälärdä 28 keşe ülde. Şulay itep, tulayım yuğaltu 29 meñ 603 buldı. Virus yoqtıruçılar 467gä arttı häm 196 meñ 46ğa citte.

İspaniyädä sälamätlek saqlaw ministrlığı soñğı 1 atnada ğomere özelüçelärneñ sanı 52 buluın belderde. Tulayım ülemnär kürsätkeçen 7nçe iyün’nän birle yañartmıylar. Ul 27 meñ 136da tuqtap qaldı. Yoqtıru oçraqları 245 meñ 268gä citte.

Portugaliyädä Kovid-19dan sonğı 24 säğat’tä 1 keşeneñ ğomere özelde häm tulayım kizüdä ülüçelär sanı 1524kä citte. Şul uq waqıtta 417 yaña yoqtıru oçrağı terkälde. Kizü başınnan birle Kovid-19 diagnozı quyıluçılar 38 meñ 89.

Meksikada ber köndä ülem oçraqları 667gä arttı häm 19 meñ 747gä citte. Yoqtıruçılarğa 5 meñ 662 keşe östälde häm 165 meñ 455 buldı.

Kön’yaq Amerikadağı Êkvadorda Kovid-19 säbäple soñğı 24 säğat’tä 80 keşe ülde. Şulay itep yuğaltu 4 meñ 87gä citte. 607 keşegä diagnoz quyılğannan soñ yoqtıru oçraqları 49 meñ 97 buldı.

Peruda soñğı köndä koronavirus 204 keşeneñ ğomeren özde. Ülem kürsätkeçe – 7 meñ 461gä citte, yoqtıru oçraqları da 3 meñ 480gä artıp 244 meñ 388gä citte.

Balkannarda koronavirus oçraqları qabat arta başladı. Şuña kürä andağı illär kizügä qarşı qayber çaralarnı qabat kertte.

Sloveniyä xökümäte çittän kergän Kovid-19 oçraqları açıqlanğannan soñ Bosniya-Gerśegovina, Serbiyä häm Kosovodan kerülär öçen bügennän başlap qabat 14 könlek karantin iğ’lan itte.

Qaratawda may axırında aktiv awıruçılar qalmağan ide. Ämma yäkşämbe könnän kübese çittän kerüe açıqlanğan 9 yaña oçraq terkälde. Bosniya-Gerśegovinadan ilgä kilüçelär öçen negativ test näticäse şartı quyıldı. Monnan tış, Qaratawda cämäğat’ urınnarında bitlek kiyü kiçägedän başlap mäcbüri.

Kosovoda 77 yaña oçraq terkälgännän soñ xökümät qayber çaralar kertte. Xezmätkärlärneñ bitlek kiyüe häm ofialarda sośial’ ara saqlaw mäcbüri buldı. Oyışmalarğa xezmät urınındağı keşe sanın kimetü öçen öydän êşlätü mömkinlege kertü kürsätmäse birelde.