Tağın ber afroamerikalını ütergän poliśiyä - xökem qarşında
Poliśiyä xezmätkärenä ülem cäzası yäisä ğomerlek törmä yanıy
AQŞnıñ Djordjiya ştatı Atlanta şähärendä afroamerikalı Rayşard Bruksnı atıp ütergän poliśiyä xezmätkäre Garret Rol’fegä qarşı 11 ayırım ğayepläw belän cinayät’ êşe açıldı.
Fulton ölkäse baş prokurorı Pol Xovard matbuğat oçraşuı ütkärde. Ul anda Bruksnıñ 42 minut buyınça poliśiyägä qarşı höcümçel bulmawın assızıqladı häm arqasınnan atqannan soñ da xezmätkärlär tarafınnan kiräkle êşçänlek başqarılmawın belderde.
“Brukska atqan waqıtta ul poliśiyä öçen aşığıç yäisä citdi fizik qurqınıç tudırmıy ide,”-dide prokuror.
Rol’fene mäxkämä ğayeple dip tapsa - ülem cäzası yäisä ğomerlek törmä yanıy. Anıñ belän bergä waqıyğa urınında bulğan poliśiyä xezmätkäre Dêvin Brosnan isä, awır qorallı höcümne dä kertep, 3 ayırım ğayepläw buyınça xökem iteläçäk.
25nçe mayda afroamerikalı Djordj Floydnıñ Minneapolista poliśiyä zolımı näticäsendä ülüeneñ qaytawazı Atlantada Rayşard Bruksnıñ iminlek saqçıları tarafınnan atıp üterelüe belän bäyle bäxäslärne qabat yalqınlandırdı.
Bäyläneşle xäbärlär
AQŞ Pol'şa belän Niderlandqa raketa cibärä
Awrupa illäre saqlanu mömkinleklären arttıru maqsatınnan AQŞtan qorallar satıp aldı