AQŞta Djordj Floydnı cirlädelär

Amerika Quşma ştatlarında poliśiyä zolımı näticäsendä ğomere özelgän afroamerikalı Djordj Floyd, X’yustondağı çirkäwdä ğailäse öeçn soñğı tapqır xuşlaşu uzdırğannan soñ, Memorial Gardens ziratına, änise Larseniya Floyd yanına kümelde.    

AQŞta poliśiyä zolımına qarşı protestlarnıñ simvolı xälenä kilgän Floyd öçen oyıştırılğan cenaza cıyınnarınıñ berençese pänceşämbe könne Minneapolis şähärendä, ikençese – şimbä könne tuğan urını Tön’yaq Karolina ştatında, öçençese isä mämläkäte X’yustonda oyıştırılğan ide. Öçesendä dä meñnärçä keşe Floydnıñ tabutı yanına kilep xuşlaştı.

AQŞtağı ilbaşı saylawlarına demokratlardan kandidat Djo Bayden cenaza cıyınına videoyazma cibärep, Floydnıñ ğailäseneñ qayğısın urtaqlaştı. Ul üzeneñ yullamasında ğadellek häm tigezlekkä basım yasadı. “Djordj Floyd öçen ğadellek urnaştırılsa, AQŞta çınnan da rasaçıl ğadellekkä taba yünäleş alğan bulabız,”-dide Bayden.

X’yuston mêrı Silvester Tyerner da cenazada çığış yasadı. Ul şähär poliśiyäseneñ qulğa alu waqıtında muyınnan uratıp alu häm qısu şikelle xaqın yuqqa çığaruçı ämer imzalayaçağın belderde. Tyerner monnan soñ iminlek saqçılarınıñ ut açqançı kisätü yasawın mäcbüri qılaçaq qağıydä kertäçäklären dä citkerde.

Şul uq waqıtta, N’yu-York ştatında poliśiyä xezmätkärläreneñ diśiplina bozuı terkäwläre yäşerenlege beterelde. Cirle qanun çığaru organı “50-a bülek” dip ataluçı dokumentnı ğamäldän çığardı. Näticädä, ştatta poliśiyä xezmätkärlärenä qarata şiqayät’lär, diśiplinar prośesslar belän bäyle tözätmälär häm dokumentlar ozaq yıllardan soñ täwge tapqır cämäğat’çelekkä açılaçaq. N’yu-York ştatı qanun çığaru organı, monnan tış, poliśiyäneñ gäwdälärenä kamera tağuların şart itep quydı. Alarnıñ saq astına alınğan keşelärneñ sälamätlegen qayğırtuların täêmin itüçe qanun proyektı qabul itelde.

N’yu-York ştatı idaräse poliśiyäneñ qulğa alğanda şöbhäleneñ muyınına bastıru ğadäten tıyu turında qarar çığarğan ide. Mêr Bill de Blasio isä şähärdäge poliśiyä idaräseneñ 6 milliard dollarlıq yıllıq byudjetın kimetäçäklären citkerde.

46 yäş’lek Djordj Floyd 25nçe mayda Minneapolista qulğa alınğanda ber poliśiyä xezmätkäreneñ ozaq waqıt teze belän mıyınına bastırıp toruı arqasında ülde. Bu ildä poliśiyä zolımı häm rasaçılıq bäxäslären qabızıp cibärde.  

Minneapolista başlanğan protest çaraları il buyınça taraldı häm yaqınça 2 atna däwam itä.