İspaniya turistlar qabul itä başlayaçaq

Dön’yada koronavirus säbäple ğomere özelüçelärneñ sanı 388 meñnän arttı. Yoqtıru oçraqları – 6 million 575 meñnän, sawığuçılar – 3 million 171 meñnän kübräk.

Amerika Quşma ştatlarında älegä qadär koronavirustan 109 meñ 142 keşe ülde, yoqtıru oçraqları – 1 million 901 meñ 783.  

Kizüneñ Awrupadağu üzäge Angliyädä Kovid-19 säbäple ğomere özelüçelärneñ sanı soñğı täwlektä 359ğa arttı häm 39 meñ 728 keşe täşkil itte. Yoqtıru oçraqları 1871gä kübäyde häm 279 meñ 856ğa citte.

Franśyädä kizü arqasında ülüçelär sanı 29 meñ 21 buldı. Soñğı täwlektä yoqtıruçılar 253 keşegä arttı häm 189 meñ 82gä citte.

İspaniyä sälamätlek saqlaw ministrlığı ildä xäzergä qadär koronavirus säbäple 27 meñ 128 keşeneñ ğomere özelüen häm 240 meñ 326 oçraq terkälüen belderde. Parlament isä kizü arqasında 14nçe marttan xäzergä qadär ğamäldä bulğan ğadättän tış xälne 21nçe iyün’gä qadär ozaytu turındağı qararnı rasladı. İspaniyä 1nçe iyül’dän çiklängän häm regional’ däräcädä çit il turistların qabul itä başlayaçaq.

Bel’giyädä koronavirus säbäple 9 meñ 548 keşe ülde. Yoqtıru oçraqları 58 meñ 767.

Tön’yaq Amerika däwlätlärennän Kanadada Kovid-19 kizüendä soñğı 2 täwlektä 178 keşeneñ ğomere özelde. Şulay itep, ildä virustan ülüçelärneñ sanı – 7 meñ 558 buldı.

Braziliyädä isä Kovid-19dan ülüçelärneñ sanı 32 meñ 568. 2 braziliyäle Oksford universitetında uylap çığarılğan vakśinanıñ täcribä êtabında qatnaşaçaq. Şulay itep, Braziliyä Angliyä tışında älege vakśina sınalğan täwge il bulaçaq.

Êkvadorda êçke häm xalıqara oçqıç säfärläre açıldı.

Meksikada mart axırınnan birle yabıq bulğan tözeleş, şaxtaçılıq, avtomobil’ detal’läre citeşterü, atıq idaräse häm velosiped satu şikelle tarmaqlar qabat êşli başladı.

Panamerikan sälamätlek saqlaw oyışması Latin Amerika illärendä yoqtıru oçraqları kimi başlağannı da kötmiçä iq’tisadqa can kertü öçen kizü belän köräş çaralarınıñ yomşartıluına borçıla. Alarnı bik iğ’tibarlı bulırğa çaqırdılar, yuqsa yoqtıru oçraqlarınıñ qabat kübäyä başlaw mömkinlege bar.