AQŞta rizasızlıq çarasında ut açtılar

AQŞnıñ Kentukki ştatı Luisvill şähärendä mart ayında öyendä poliśiyä tarafınnan üterelgän qara tänle Breonna Taylor öçen ğadellek taläp itep oyıştırılğan rizasızlıq çaralarında ut açıldı. Anda 7 keşe yaralandı.

Luisvill poliśiyäse yaralanuçılardan berseneñ xäle awır buluın, qayber keşelärneñ saq astına alınuın belderde.

“Courier Journal” gazetı yazğança, çarada yaqınça 500-600 keşe qatnaşqan. 6 säğat’tän soñ alar yañğır yawu säbäple taralışqan.

Luisvill mêrı Greg Fişer tön urtası citkändä Twitter häm Facebooktan yazma urtaqlaştı. Anda ul Breonna Taylornıñ äniseneñ ğadellek öçen köräşkändä tınıçlıq saqlanuı teläwen citkerde.

Aşığıç yärdäm texnigı 26 yäş’lek Taylornı 13nçe martta Luisvill narkotiklar belän köräş bülege detektivları üz öyeneñ işek töbendä  atıp üterde. Anıñ tänenä 8 yädrä kerä. Taylornıñ öyendä narkotik matdä tabılmıy häm ğailäse may başında poliśiyägä qarşı däğ’wa aça.

Djordjiyada qara tänle Ahmaud Arberinıñ fevral’ ayında yögergändä ätile-uğıllı ike keşe tarafınnan üterelüe bilgele bulğannan soñ, Taylor waqıyğası da il matbuğatında iskä alındı.

Minneapolis şähärendä poliśiyäneñ köç qullanuı näticäsendä qara tänle Djordj Floydnıñ ülüennän soñ rizasızlıq çaraları başlandı. Anıñ 3nçe könendä çaralarda qatnaşuçılar poliśiyä bülegenä kerep binağa ut törtte.

AQŞ ilbaşı Donal’d Tramp rizasızlıq çaralarınıñ köç qullanu waqıyğalarına äwerelüennän soñ Minneapolis şähäreneñ mêrı häm protestçılarnı kisätte. Ul Twitterdağı yazmasında qalada lider yuqlığına işarät itep bolay dide: “Yä bik köçsez radikal sulçı mêr Jakob Frey tizräk şähärne kontrol’ astına alır, yäisä min gvardiyäçelärne cibärep êşemne xäl itärmen”.