Nigeriyalılar Nigerğa qaça

Nigeriyädäge qurqınıç waqıyğalar 23 meñ keşene kürşe däwlät Nigerğa qaçarğa êtärgän. Bu xaqta BMOnıñ migrantlar yuğarı komissarlığı belderde. Anıñ süzçese Babar Baloş jurnalistlarnıñ sorawlarına cawap birep bolay dide: “Nigeriyäneñ tön’yaq-könbatışında baruçı dähşätle waqıyğalar häm bäreleşlär säbäple meñlägän keşe aprel’ ayında tağın da imin tormış êzläp Niger cirlärenä küçende”.

Uzğan yılnıñ aprel’ ayınnan birle isä barlığı 60 meñ nigeriyalı Nigerğa sıyınğan. Bigräk tä Sokoto, Zamfara häm Katsina töbäklärendä qorallı törkemnär cirle xalıqnı qurqıtıp tora. Daimi räweştä höcümnär oyıştırıp ber säbäpsezgä üterep kitälär yäisä urlıylar. Ul yaqlardağı xalıq xäzer Nigernıñ Maradi töbägenä sıyına.

Wäqalätle zatlar Nigeriyadağı qurqınıçsızlıq problemasınıñ Nigerğa çäçräwennän qurqa. Çik buyında yäşäwçelär inde tınıçsızlıq xis itep ilneñ êçkärge regionnarına kitä başlağan. Barlığı 19 meñ nigerlı öylären taşlap küçenergä mäcbür bulğan.