Franśiyädä berençe Kovid-19 oçraqları noyabr’dä kürengän bulırğa mömkin
Könbatışta koronavirus belän bäyle soñğı sannar häm waqıyğalar
Dön’yada koronavirus belän bäyle ülemnär 270 meñnän, yoqtıru oçraqları 3 million 861 meñnän arttı. Sawığuçılarnıñ sanı isä 1 million 330 meñ buldı.
Kizüneñ märkäze xälenä kilgän Amerika Quşma Ştatlarında ilbaşı Donal’d Tramp belän yaqın êlemtädä toruçı xezmätkärlärneñ berseneñ koronavirus testı pozitiv çıqtı. Bu xaqta Aq Yort süzçese urınbasarı Xogan Gidli yazmaça belderü yasadı. “İlbaşı Tramp häm anıñ yärdämçese Mayk Pensqa da test yasaldı häm näticä negativ çıqtı”. Şul uq waqıtta, Pentagon koronavirustan däwalanıp terelüçelärneñ älegä armiyägä çaqırılmayaçağın belderde. Bu çirneñ organizmğa birgän zararınıñ xäzergä bilgele bulmawı belän bäyle.
Awrupada kizüneñ märkäze xäzer Angliyägä küçte. Biredä soñğı täwlektä Kovid-19dan ülüçelärneñ sanı 649ğa artıp 30 meñ 76 keşe täşkil itte, yoqtıru oçraqları isä 201 meñ 101 buldı.
İtaliyada Kovid-19 säbäple ğomere çzelüçelär soñğı 24 säğat’tä 274kä arttı häm 29 meñ 958 buldı.
Franśiyädä koronavirus säbäple ülüçelär 25 meñ 987gä citte. 209 meñ 444 keşegä diagnoz quyıldı. Şul uq waqıtta, Kol’mar şähärendäge Al’bert-Şveyśer xastaxanäsennän yasalğan belderüdä berençe Kovid-19 oçraqlarınıñ 16nçı noyabr’dä kürengän bulu mömkinlege belderelde. Älege waqıtta kükräk tomografiyäse töşerelgän keşelärdä koronavirus buluınnan şöbhälänelä. Alarğa test yasalaçaq.
Daniyada kizü säbäple 514 keşeneñ ğomere özelde, 10 meñ 83 keşedä virus açıqlandı. İldä ğadäti tormışqa qaytunıñ ikençe êtabı 11nçe mayda başlanaçaq.
