Bizgäkne mikrob ciñä
Belgeçlär malyariya bizgägen ciñärlek açış yasadı
Keşelärgä bizgäk yoqtıruçı ozınborınnar nik üzläre awırmıy? Alarnıñ bu parazittan saqlanuın täêmin itüçe bar bulıp çıqtı. Belgeçlär yaña ber mikrob açtı.
BBCneñ xäbärenä qarağanda, Angliya häm Keniyada êşçänlek alıp baruçı tikşerenüçe törkem här yıl yöz menlägän keşeneñ ülemenä kiterüçe malyariya bizgägen kontrol’gä alu mömkinlege birerlek ähämiyätle açış yasawların belderde.
Keniyadağı Viktoriya küle yarlarınnan alınğan ozınborınnarnı tikşerü ğacäyep näticägä kiterä. Alarnıñ êçendäge “Mikrospora MB” mikrobı bizgäk parazitınıñ kerep urnaşuına röxsät birmi, yağ’ni ozınborınnarnı awırudan saqlıy.
Belgeçlär mikrobnıñ niçek tizräk tarala alu belän bäyle tikşerenülär uzdıra. Şulay uq, bizgäkne bu räweşle kontrol’ astına alu mömkinlege dä bäxäslär uyata.