Könbatışta koronavirus: söyeneçle sannar da bar

Koronavirus belän bäyle ülemnär dön’ya külämendä 203 meñ 300dän, yoqtıru oçraqları 2 million 922 meñnän arttı. 837 meñläp keşe isä terelep çıqtı.

52 meñ keşeneñ üleme näticäsendä kizüneñ märkäze xälenä kilgän AQŞta N’yu-York gubernatorı Êndryu Kuomo daruxanälärgä Kovid-19 testı yasaw wäqaläte birde.   

İtaliyada koronavirus säbäple soñğı 24 säğat’tä 415 keşe ülde. Şulay itep, ildä bu kizüdä ğomere özelüçelär sanı 26 meñ 384kä citte. Alar arasında 150 tabib ta bar. İldä aktiv koronavirus yoqtıru oçraqlarında atna başında başlanğan azayu küreneşe kiçä dä däwam itte. 680gä kimep 105 meñ 847 buldı.

İspaniyädä Kovid-19 kizüendä ülüçelärneñ sanı soñğı täwlektä 288gä arttı häm 23 meñ 190 keşe buldı.Yoqtıru oçraqları 225 meñ 488gä citte. Terelüçelär 98 meñ 732 buldı. Kiçä 3 meñ 24 keşe xastaxanädän çıqtı.  Xökümät räise Pedro Sançes, ğadäti tormışqa êtaplap kire qaytu prośessı qısalarında, 2nçe maydan başlap berämläp uramda sport belän şöğıl’länergä häm yörergä röxsät itüne planlaştıruların belderde. İspaniyädä sulçı koaliśiyä xökümäteneñ ğadättän tış xäldä qayber çikläwlärne beterüe näticäsendä 14 yäş’tän keçkenä balalar da uramğa çığa başladı.   

Franśiyädä Kovid-19 kizüe säbäple soñğı ber täwlektä ğomere özelüçelär sanı 369ğa arttı häm 22 meñ 614 keşe täşkil itte. Virus yoqtıruı açıqlanğan keşe sanı isä 186 meñ 358gä citte.

Braziliyada Kovid-19 säbäple ülüçelär sanı 346 keşegä arttı. Kizüdä, şulay itep, barlığı 4 meñ 16 braziliyäleneñ ğomere özelde. Virusnı yoqtıru oçraqları 58 meñ 509 bularaq terkälde.

Argentinada 186 keşeneñ ğomere özelde, 3 meñ 780e awırunı yoqtırdı. Kizü belän köräş öçen 20nçe martta iğ’lan itelgän karantin 3 tapqır ozınaytıldı. Däwlät başlığı Al’berto Fernandes mäcbüri izolyaśiyäneñ 10nçı mayğa qadär däwam itäçägen belderde.