Bu koronavirus turında 2018nçe yılda uq kisätkännär

AQŞ dön’ya külämendä kizügä kitergän yaña tör koronavirusnıñ Qıtaydağı ber laboratoriyädän çığu ixtimalın tikşerä.

CNN telekanalında çıqqan xäbärdä äytelgänçä, Amerika Quşma Ştatlarınıñ küzläw häm milli qurqınıçsızlıq oyışmaları başta Qıtaynıñ Uxan’ şähärendäge balıq bazarına barğan keşelärdä oçrağan häm şunnan kilep çıqqan dip sanaluçı Kovid-19 virusınıñ çınlıqta bu şähärdäge ber laboratoriyädän yalğışlıq belän keşelärgä yoğu mömkinlegen alğa sörä. Alar Qıtaynıñ koronavirusnı biologik qoral bularaq uylap çığaruın äytmi. Ämma laboratoriyä şartlarında tikşerenü alıp barılğan waqıtta xata yasalu yäisä biologik materialnıñ naçar saqlanuı arqasında xezmätkärlärgä yoğıp tışqa çıqqan buluın farazlıylar.

Agentlar monıñ barı tik teoriyä buluın, küzläw oyışmalarınıñ zur yoğıntılarğa kitergän mondıy oçraqlarda küp sanda törle mömkinleklärne küz uñında totıp tikşerü alıp barularınıñ ğadäti xäl ikänen assızıqladı.

“Washington Post” gazetında da 14nçe aprel’dä çıqqan xäbärdä AQŞnıñ Pekindağı ilçelegeneñ 2018nçe yılda däwlät departamentına cibärgän şifrlanğan yazmalarınıñ êçtälege birelde. Anda Uxan’ virusologiya institutı laboratoriyäsendä yarqanatlardağı beta-koronaviruslar belän täcribälär ütkärelüe häm qurqınıçsızlıq şartları borçu tudıruı turında äytelä.

Xäbärgä qarağanda, AQŞnıñ Uxan’ konsulı Djemison Fuss belän ilçelek kiñäşçese  Rik Svitśer 2018nçe yılnıñ 27nçe martında laboratoriyägä barğan. Şunnan soñ Amerikanıñ däwlät departamentına yäşeren mäğ’lümat cibärälär. Anda laboratoriyädä tikşerelüçe yarqanatlardan SARSqa oxşaş koronavirusnıñ xezmätkärlärgä küçep, alardan başqalarğa yoğu qurqınıçı turında kisätelä.