Germaniyädä töreklär buşlay bitlek tarata

Germaniyädä Diniyä êşläre törek İslam berlegenä bäyle cämğıyät’lär koronavirus belän köräş maqsatınnan bitleklär tegep buşlay tarata başladı. Bu êşne kübräk xatın-qızlar başqara. Alar üzläre tekkän bitleklärne şähär xastaxanäläre, qartlar yortları, daruxanä, poliśiyä häm yanğın sünderü büleklärenä, säwdägärlärgä häm kürşelärenä buşlay iltep birä.

Diniyä êşläre törek İslam berlege Bad Kroyśnax üzäk mäçete cämğıyäteneñ xatın-qızlar bülege başlığı Nazmiyä Cäyxan bolay dip añlata: “Päyğambärebezneñ “Keşelärneñ iñ xäyerlese keşelärgä faydalı bulğanı” xädisennän ilham alıp êşlibez. Maqsatıbız – cämğıyät’kä häm keşelärgä faydalı êşçänlek alıp baru. Xatın-qızlarıbıznıñ öylärendä tekkän bitleklären tüläwsez taratabız. Bu prośessta berdämlek häm berlekne alğı planğa çığaru kiräk”.