Böyä töbendä - 3 meñ mäyet

Ruandada 1994nçe yıldağı genośid waqıtında mennärçä keşeneñ gäwdäse atıluı farazlanuçı böyäneñ suın buşatu häm qazu êşläre başlandı.

“The New Times”nıñ xäbärenä qarağanda, älege böyä Kayonza töbägendä urnaşqan. Anda sunı buşatu 2 atna êlek başlandı.

Wäqalätlelär bu atnada böyä bulğan cirneñ kibüen kötä. Annarı tufraq astındağı kümäk qaberlekne êzläw başlanaçaq.

Yaqınça 2 yıl êlek böyä sayıqqan waqıtta şul tirädä yäşäwçelär tufraq astınnan 51 skelet tabıp ala. Tögäl sanı bilgele tügel, ämma su astında 3 meñgä yaqın cäsäd buluın farazlıylar.  

Ruandada 1994nçe yılnıñ 7nçe aprelendä xutular tutsilärgä qarşı zur külämle genośid başlıy. Yaqınça 100 kön barğan qan qoyuda 800 meñ keşeneñ ğomere özelä.

Xutular belän tutsilär başta êtnik bularaq ber-bersennän ayırılmıy diyärlek. Tutsilär terlekçelek belän şöğıl’länä, xutular – iğençelek. Waqıt uzu belän tutsilär östen sıynıfqa äwerelä häm cämğıyät’tä yuğarı däräcäle urın bili, xutular isä êlekkegeçä yarlı krest’yan bulıp qala. Şul uq waqıtta, tutsilär – azçılıq. İldäge xalıqnıñ küp öleşe – xutular. İke sıynıf arasındağı qarşılıq Bel’giyä koloniyäse çorında tua. Elek bayığan xutular tutsigä äwerelsä, ä bölgenlekkä töşkän tutsilär, kiresençä, xutuğa, kolonizatorlar alarnı ike êtnik törkem bularaq ayıra häm monı passportlarına terkäp quya.