Êt häm mäçe - rizıq tügel

Sin’śzyan’ - Qıtayda mäçe, êt ite aşaw häm satu tıyılğan berençe şähär buldı. Qala idaräsennän yasalğan belderüdä bolay diyelä: “Êt häm mäçelär yort xaywannarı bularaq keşelär belän, başqa xaywannarğa qarağanda, tağın da yaqın êlemtädä. Mäçe, êt häm başqa yort xaywannarın azıq bularaq qullanu alğa kitkän illärdä, Gonkong häm Tayvan’da tıyılğan”.

Qarar Sin’śzyan’da 1nçe maydan ğamälgä keräçäk.

Xaywan xoquqların yaqlawçı Xalıqara śivilizaśiyäle cämğıyät’ oyışması bu qararnı söyeneç belän qarşıladı. Belgeç Peter Li: “Bu, çınnan da, Qıtayda här yıl 4 million mäçe häm 10 million tiräse êtne üterügä kiterüçe räximsez säwdäne tuqtatu yulında borılış noqtası diyärlek mizgel bulırğa mömkin,”-dide.

Oyışma beldergänçä, Aziyada här yıl 30 million êtne it öçen üterälär.

Qıtayda koronavirus kizüe arqasında qırğıy xaywan belän säwdä itü tıyıldı. Alarnı satuçı bazarlar küp bulğan Guandun provinśiyäsendä qanunnı ütämiçä tıyılğan xaywannarnı aşawnı däwam itüçelärgä ştraf kertelde.