Koronavirus pandemiyä buldı

Bötendön’ya sälamätlek saqlaw oyışması yaña tör koronavirusnı pandemiyä (global’ kizü) bularaq bäyäläde. Ğomum direktor Tedros Adxanom Gebreyesus bu xaqta oyışmanıñ Jenevadağı üzägendä uzğan matbuğat cıyılışında belderde. Ul 2 atna êçendä Kovid-19 yoqtıru oçraqlarınıñ Qıtay tışında 13 tapqır artuın, çir ütep kergän däwlätlärneñ 3 qat kübäyüen citkerde.

 Gebreyesus äytüençä, oyışma kizüne 24 säğat’ buyınça küzätep bara häm anıñ zur tizlek belän taraluı öçen citdi borçıla. Ul virusqa qarşı xäräkätneñ citärlek bulmawın belderde.

“Şuña kürä Kovid-19nı pandemiyä bularaq bäyäli aluıbıznı uyladıq,”-dide Gebreyesus.

 Bötendön’ya sälamätlek saqlaw oyışması Qıtayda päyda bulğan yaña tör koronavirus kizüe belän bäyle räweştä 30nçı ğıynvarda xalıqara cämäğat’çelek sälamätlegendä ğadättän tış xäl iğ’lan itkän ide.