Könbatışta koronavirus

Awrupa däwlätlärendä koronavirus yoqtıru oçqarları arttı, AQŞta da awıruçılar kübäyde.

Tön’yaq İrlandiyä häm Niderlandta koronavirus oçraqları terkälde.

Şveśiyädä tağın 5 keşedä Kovid-19 açıqlandı häm awıruçılar sanı 7gä citte.

Franśiyä ilbaşı Êmmanuêl’ Makron başqala Parijdağı yoğışlı awırular xastaxanäsendä buldı. Ul Kovid-19 kizüenä qarşı çaralar belän yaqınnan tanıştı. İldä 20 yaña awıru oçrağı terkäde. Şulay itep, koronavirus yoqtıruçılar sanı 28gä citte. Ülüçelär - 2.

Awrupada virustan in küp ülüçe - İtaliyädä. Grajdannar saqlanu ğomum mödire Angelo Borelli beldergänçä, bügengä qadär 17 keşeneñ ğomere özelgän, yoqtıruçılar - 650gä citkän.

İspaniyädä Kovid-19 oçraqları 14kä citte. Başqala Madridta terkälgän 2 yaña awırunıñ virus taralğan cirleklärgä säyäxät itüe açıqlanğan.

Greśiyädä dä tağın 2 keşedä koronavirus kürende häm awıruçılar sanı 3 buldı. İlneñ sälamätlek saqlaw ministrı Vasilis Kikilyas, iminlek yözennän, bu atnada planlaştırılğan barlıq karnaval çaralarınıñ ğamäldän çığarıluın belderde.  

Avstriyädä koronaviruslılar sanı 3kä citte. Kiçä Venada tağın ber keşeneñ analizlarında yoğışlı awıru kürengän.

Germaniyädä Kovid-19nıñ 14 yaña oçrağı terkälde. Şulay itep, awıruçılar sanı 31 buldı.

AQŞnıñ Kaliforniyä ştatında 33 keşedä koronavirus terkälde.