Tatarstanda häm dönyada koronavirusı

Tön’yaq Makedoniyada berençe yaňa tör koronavirusı (Kovid-19) oçrağı kürende.

Sälamätlek saqlaw ministrı Venko Filipçe çärşämbe könne Yoğışlı awırular sırxawxanäsenä salınğan 1970nçe yılğı xatın-qızda yaňa tör koronavirusınıň (“Kovid-19”nıň) bilgelänelüen, monıň başqala Skopyedä kürengän berençe oçraq buluın äytte.

"Panikağa kiräk yuq”, - dip äytüçe Filipçe bu keşeneň karantin astına alınuın assızıqladı.

Virus bilgelängän xatın-qıznıň 1 ay İtaliyada qaluı belderelde.

Daniya häm Êstoniya da berençe koronavirusı oçraqlarınıň bilgelänelüen açıqladı.

Franśiyada tağın ber keşedä koronavirusınıň bilgelänelüe belän xastalıqnı êläkterüçelärneň sanı 18gä citte.

Bu keşelärdän 11e yaxşırğan bulsa, 2se häläq’ bulğan ide.

Şveśiya xalıq sälamätlege oyışmasınnan yasalğan yazma belderüdä dä İtaliyanıň tön’yağınnan qaytqan 30 yäşendäge ber xatın-qızda “Kovid-19”nıň bilgelänelüe, ildä virusnı êläkterüçelärneň 2gä citüe äytelde.

Finlyandiya başqalası Xel’sinkidä dä İtaliyadan qaytqan xatın-qızda koronavirusınıň bilgelänelüe belän awıruçılar sanı 2gä citte.

Xastalıq arqasında 12 keşe ülgän İtaliyada isä awıruçılar sanı 400gä citte.

Amerika Quşma Ştatları däwlät departamentı watandaşların yaňa tör koronavirusı (Kovid-19) oçraqları kürengän İtaliyağa säyäxät itkän çaqta “iğ’tibarlı bulu” mäs’äläsendä kisätte.

Däwlät departamentınnan yasalğan yazma belderüdä İtaliyanıň säyäxät itelgän çaqta “çaralarnıň kürelüe zarur” urınnar kategoriyasına alınuı äytelde.

Departamentnıň Mongoliya belän bäyle belderüendä isä kizüneň bu ilgä dä barıp citüe assızıqlanıp, “Säyäxätegezne küzdän kiçeregez” çaqıruı yasaldı.

Şul uq waqıtta Angliya matbuğatında çıqqan häm xökümät xisabına nigezlängän xäbärlärgä kürä, êpidemiya barı tik Böyek Britanda ğına da yarım million keşeneň ülemenä säbäp bula ala.

“Covid-19 Reasonable Worst Case Scenario” isemle xisapta kizü pandemiyägä äylängän oçraqta xastalıqnıň Angliyanıň 80%ına yoğaçağı häm 500 meň keşeneň canın ala alaçağı belderelä.

Şul arada “Diamond Princess” laynerınnan Tatarstan başqalası Qazandağı klinik yoğışlı awırular xastaxanäsenä salınğan sigez keşeneň öçesendä Kovid-19 koronavirusı buluı açıqlanğan.

Tatarstan İlbaşı idaräseneň matbuğat xezmäte citäkçese Liliyä Ğalimova virusnıň taraluınıň mömkin bulmawın belderde.

“Bu – maxsuslaştırılğan xastaxanä. Ul ğadäti sırxawxanä yäki şifaxanä tügel. Çönki anda, berençedän, tiyeşle cihazlar, ikençedän, tege yäki bu yoğışlı awıru taralğan oçraqta nişlärgä kiräklegen ênäsennän cebenä xätle belä torğan personal bar”, - dip äytte ul “Tatar-inform” agentlığına.

Ğalimova süzlärençä, Respublika klinik yoğışlı awırular xastaxanäsendä êşläwçe tabiblar, başqa illärdän kilgän berär turist infekśiya alıp kerä alsa dip, Qazanda ütkärelgän xalıqara çaralar aldınnan maxsus kurslar uzğan.

Matbuğat xezmäte citäkçese êvakuaśiyälängän awırularnıň dürteseneň Tatarstan watandaşı buluın iskärtep uzdı.

Rusiyä ğadättän tış xällär ministrlığınıň maxsus oçqıçı belän Yaponiyada tuqtağan kruiz köymäsennän Rusiyä turistları Tatarstan başqalası Qazanğa kiterelgän ide. Alarnıň öçesendä koronavirus infekśiyäse açıqlanğan ide.

Fotosürät“Tatar-inform” agentlığı säxifäsennän alındı.