Ukraina İranğa basım yasıy

Ukraina 8nçe ğıynvarda Tähran östendä bärep töşerelgän oçqıçları öçen İranğa basım yasıy. Bu xaqta Ukraina tışqı êşlär ministrı Vadim Pristayko belderde.

“Tähran belän oçqıçnıñ qara tartması mäs’äläsendä dä, xezmättäşlek itü nisbätennän dä başınnan birle awır buldı. Ämma bez süzebezdä toraçaqbız. Kiläçäktä qara tartmalarnı niçek alaçağıbız häm niçek tikşeräçägebez xaqında planıbız bar. 5 il belän bergä êş itäbez,”-dide ul.

Qara tartmanı birergä niyäte bulmawın İran 19nçı ğıynvarda belderde. Pristayko basım yasawların däwam itäçäklären äytä. “Bez ämer-komanda çılbırında kem bar, atarğa kem quştı - belergä häm anı xökem qarşına çığarırğa telibez,”-di Ukraina tışqı êşlär ministrı.

İsegezgä töşeräbez, Ukraina başqalası Kiyevqa baru öçen Tähran xalıqara İmam Xumeyni aêroportınnan kütärelgän oçqıçnı cirdän hawağa atılğan 2 raketa belän bärep töşerdelär. Anıñ êçendäge 176 keşe hälaq buldı.