AQŞnıñ "ğaläm oçqıçı" proyektı kiştägä mende

AQŞ saqlanu ministrlığı “Êksperimental’ ğaläm oçqıçı” (XSP) proyektın kiştägä quydı. Moña 2017nçe yılda başqaruçı itep saylanğan Boing firmasınıñ proyekttan çığuı säbäpçe bula.

Perspektivalı saqlanu tikşerenü proyektları agentlığınıñ êlemtä direktorı Djared Adams programmanıñ maqsatların sızıp atmawların, kiläçäktä başqa köndäşçel proyektlar aşa alarğa ireşergä tırışaçaqların citkerde.   

Proyekt AQŞ hawa quätläreneñ orbitağa tağın da tiz häm daimi räweştä iyärçen urnaştıra aluın täêmim itü öçen qabat qullanıla ala torğan ğaläm oçqıçı yasaw maqsatı belän 2013nçe yılda başlandı.  

Ul 10 köndä 10 tapqır tulayım 1360 kilo awırlığındağı iyärçenne orbitağa mengerä alırlıq bulırğa tiyeş ide.

Agentlıq 2017nçe yılda oçqıç öçen prototip yasaw täq’dimnäre arasınnan Boing firmasın sayladı. Şirkät “Fantom Êkspress” dip ataluçı prototip oçqıç tözede. Anıñ sınawı bıyıl ütärgä tiyeş ide.