"Şarl’ de Goll’" Yaqın Könçığışqa quzğala
Franśiyä xärbi flotınıñ flagmanın DEAŞ belän köräşkä cibärälär
Franśiyä ilbaşı Êmmanuêl’ Makron oçqıç korabı "Şarl’ de Goll’"neñ Yaqın Könçığışqa cibäreläçägen citkerde. Ul aprel’ ayına qadär anda Çammal operaśiyäsenä yardam kürsätäçäk. Makron köymäneñ ber ük waqıtta Awrupa däwlätläre belän bergä yasalaçaq urtaq xäräkätlärdä dä qatnaşaçağın äytte. Anıñ fikerençä, Yaqın Könçığışta terrorçı oyışma DEAŞnıñ yanawı qabat arttı.
Franśiyä başqalası Parijda 2015nçe yılnıñ 17nçe noyabrendä 130 keşeneñ ğomeren özgän DEAŞ höcümennän soñ 24 xärbi oçqıç sıydırışlı "Şarl’ de Goll’" korabı Urta diñgezneñ könçığışına cibärelde. Uzğan yıl isä ul Kön’yaq-Qıtay diñgezendä xezmät itte.
Çammal operaśiyäsenä kilgändä, Franśiyä anı 2014nçe yılnıñ 19nçı sentyabrendä Ğıyraqta DEAŞqa qarşı başladı. Soñınnan ul Süriyäne dä üz êçenä alırlıq itep kiñäytelde.
Bäyläneşle xäbärlär
AQŞ Pol'şa belän Niderlandqa raketa cibärä
Awrupa illäre saqlanu mömkinleklären arttıru maqsatınnan AQŞtan qorallar satıp aldı