Qar astında ülem

Paqıstanda soñğı 2 köndä küp qar yawu säbäple qar işelü häm taşqınnar şikelle afätlär buldı. Alar näticäsendä ülüçelärneñ sanı 95kä citte.

İlneñ ğadättän tış xällär agentlığınnan belderülärençä, ğomer özelügä qar taşqını, cir şuışu, su basu häm tübä işelü kitergän.

Azad Cammu häm Käşmirdäge Neelum üzänlegendä 15 awıl qar taşqını häm cir ubılularğa duçar bula. Anda 67 keşeneñ ülüen häm 53eneñ yaralanuın belderälär. Belucistanda isä 21 keşeneñ ğomere qar arqasında özelgän.

Cirle matbuğat çaralarında äytelgänçä, Pencap töbägendä dä 7 keşe hälaq bulğan.

Käşmirdä bik küp toraq punkt belän êlemtä özelgän häm tağın taşqın bulu ixtimalı säbäple uqular tuqtatılğan.

Paqıstan xökümäte räise İmran Xan Twitter sośial’ mediası säxifäse aşa belderü yasadı. Anda ul Käşmirdä xärbi xezmätkärlär belän barlıq däwlät oyışmalarına qotqaru häm yärdäm çaralarında qatnaşu kürsätmäse birüen citkerä. Ul üze dä wäzğıyät’ne centekläp öyränü häm yaralılarnıñ xälen belü öçen Käşmirgä kitte.       

İlneñ iñ ähämiyätle turizm üzäklärennän berse Gilgit-Baltistan töbäge dä soñğı 50 yıldağı iñ köçle qar yawuğa duçar buldı. Anda tawlı cirleklärdä qar taşqını häm cir ubılu yanawı turında kisätü yasaldı.