"Söläymaninıñ ütkäne qurqınıç"

AQŞ ilbaşı Donal’d Tramp üterelgän iranlı general Qasıym Söläymaninıñ ütkäne qurqınıç buluın häm Amerikağa annan yanaw yasaluı yäisä yasalmawınıñ ähämiyätle tügellegen belderde. Ul älege şäxeskä qarşı oyıştırılğan hawa höcümen häm anıñ waqıtın saylaw säbäben tikşerüçe demokratlarğa reakśiyä belderde.

“Demokratlar häm yalğançı media 20 yıl êlek êşlänergä tiyeşle ğamälne barı tik min başqarğan öçen genä terrorçı Söläymaninı kamil keşe şikelle kürsätergä tırışa. İq’tisadi yäisä xärbi mäydanda êşlägän här êşemne çiktän tış sulçı demokratlar kiräksezgä çığara. Üzläreneñ berni êşlägäne yuq,”-dide AQŞ ilbaşı.

Tramp, şul uq waqıtta, Söläymaninıñ AQŞ öçen yaqın waqıtta zur yanaw barlıqqa kiterüen dä äytä. “Yalğançı xäbär mediası häm demokrat urtaqları Söläymaninıñ AQŞqa qarşı yaqın kiläçäktä höcüm yasaw mömkinlegen tikşerä. Cawap - kisken räweştä äye, ämma anıñ ütkändä niqadär qurqınıç keşe buluın isäpkä alğanda, monıñ ähämiyäte yuq,”-di ul.

Tramp İranda idarägä qarşı çaralarda qatnaşuçılarnıñ cirdäge AQŞ bayrağına basmawı turında da telgä aldı häm monı “zur alğa kiteş” bularaq bäyäläde.