Bosniyä-Gerśegovinada mäçetkä höcüm

Bosniyä-Gerśegovinanıñ serblar küp yäşäwçe Bosanska Dubiśa şähärendä tarixi Çarşı mäçeteneñ täräzälären wattılar, divarlarına zarar birdelär. Älege ğıybadätxanä 17nçe ğasırda tözelgän. Bosniyädäge suğış waqıtında ul cimerelä. 2003nçe yılda mäçet tözekländerelep qabat ğıybadät öçen açıla.

Ğıybadätxanägä höcüm şähärdäge möselman bosniyälelärneñ açuın qabarttı. Bosanska Dubiśanıñ baş imamı Safet Beganoviç waqıyğa turında cirle dairälärgä mäğ’lümat citkerüen belderde. Höcümçelär mäçet uramındağı utırğıçlarnı da bozğan.

Bosniyä Gerśegovina islam berlegennän belderülärençä, şähärdäge tarixi mäçet uzğan yıl da oxşaş höcümgä duçar bulğan.

Qalanıñ serb xakimiyät başlığı Radenko Reliç isä höcümne ğayepläde häm mäçettäge barlıq zararnı qaplayaçaqların citkerde.  

Bosniyä-Gerśegovinanıñ Xorvatiyä çigendä urnaşqan Bosanska Dubiśa şähärendä 2013nçe yıldağı xalıq sanın alu näticäläre buyınça 18 meñ serb, 2 meñ bosniyäle yäşi.