Layıqlı yalğa 64 yäş'tän çıqmayaçaqlar

Franśiyädä layıqlı yalğa çığu yäşen 64kä citkerüdän waqıtlıça baş tarttılar. Bu xaqta xökümät räise Êduard Filipp belderde. Älege pensiyä reforması ildä rizasızlıq çaralarına säbäpçe buldı.

Filipp pensiyä reforması turında hönäri berleklärgä xat cibärde. Anda sistemağa berdäy tärtip kerteläçäge häm törle tarmaqlarğa birelgän östenleklär betereläçäge äytelä.  Franśiyädä moña qadär 42 pensiyä töre bar ide.

64 yäş’tä layıqlı yalğa çığunı küzallawçı programma älegä ğamälgä kermäyäçäk. Anıñ urınına närsä bulasın maxsus konferenśiyädä söyläşäçäklär. Andağı qararlar aprel’ ayında xalıqqa citkeräläçäk.

Franśiyäneñ demokratik xezmät konfederaśiyäse belderü yasap, Filippnıñ bu açıqlawlarınnan qanäğat’ qaluların, ämma reformağa başqa üzgäreşlär kertü öçen köräşneñ däwam itäçägen citkerde.

Ğomum êş konfederaśiyäse isä belderüne citärlek dip tapmadı. Hönärçe berleklären 16nçı ğıynvardan reformağa qarşı il külämendä qabat çaralar ütkärergä çaqırdılar.

Pensiyä reforması 24nçe ğıynvarda ministrlar kabinetı häm 17nçe fevral’dä parlamentta qaralaçaq.