İran yanawların däwam itä

İran Ğıyraqtağı AQŞ bazalarına höcüm belän üç alu tögällände dip sanamıy. Ğomumştab süzçese Äbulfazıl Şikarçi Fars xäbär agentlığına belderüendä Vaşington idaräseneñ xärbi üzäklären regionnan çığarğanğa qadär däwam itäçäklären belderde.

Şikarçi AQŞnıñ yaxşı saqlanu sisteması bulmawın häm raketalarnıñ iñ zur, iñ nıq cihazlandırılğan bazağa bärüen kirtäli almawın söyli. Ul bu xälneñ regionda AQŞqa bäyle räweştä xäräkät itüçe illär öçen dä sabaq ikänen assızıqladı.

“Älege höcümnärne üç alunıñ tögällänüe bularaq kürmibez. Çın üç alu şundıy däräcädä bulaçaq ki, AQŞlılar här närsälären cıyıp regionnan kitärgä mäcbür bulaçaq,”-dide süzçe.

Şikärçi höcümnän alda AQŞ belän İrannıñ koordinaśiyäle xäräkät itüe häm bazalarnıñ bu säbäple buşatıluı turındağı süzlärneñ yalğan buluın citkerde. “AQŞnı cällad doşman bularaq küräbez. Amerikalılar üz maqsatlarına ireşü öçen bu küzallaw operaśiyälären başqara,”-dide ul.  

Tähranda hälakätkä yulıqqan Ukraina hawa yulları oçqıçınıñ raketalar belän bärep töşerelüe turında da süz buldı. Ğomumştab süzçese monıñ psixologik suğışnıñ ber öleşe buluın häm AQŞ mänfäğat’lären yaqlawçılar tarafınnan uylap çığarıluın äytä.