Êyfel' manarası yabıldı

Franśiyädä ilbaşı Êmmanuêl’ Makron idaräseneñ pensiyä reformasına qarşı başlanğan êş taşlawlar däwam itä. İl külämendä protest çaraları qabat quzğaldı.

Franśiyädäge iñ zur hönärçe berleklärennän Ğomum êş konfederaśiyäse çaqıruı belän başqala Parijnıñ Cömhüriyät mäydanında cıyılğan protestçılar Xalıq mäydanına qadär yöreş yasadı. Anıñ waqıtında poliśiyä belän çarada qatnaşuçılar arasında bäreleş kilep çıqtı. Tärtip saqçıları äçe gaz belän qarşılıq kürsätte.   

Parij poliśiyä idaräse başqaladağı çaralarda 30 keşeneñ saq astına alınuın belderde.

İlneñ bik küp şähärendä protestçılar demonstraśiyälär uzdırudan tış yullarnı qapladı.

 Êçke êşlär ministrlığı mäğ’lümatlarına qarağanda, ildä 80 törle noqtada uzğan çaralarda 615 meñ keşe qatnaştı. Hönärçe berlegennän isä 1 million 800 meñ keşeneñ uramğa çığuı turında belderälär.

Şul uq waqıtta, Makron idaräseneñ pensiyä reformasına qarşı başlanğan êş taşlawlarnıñ 13nçe köne. Başqala häm törle şähärlärdä transport häm poyızd säfärlärendä xilaflıqlar buldı. Êyfel manarası häm Versal’ sarayın da kertep ilneñ bik küp muzeyları qararğa kilüçelär öçen yabıldı.   

Franśiyä xökümäte räise Êduard Filippe parlamentta yasağan belderüendä pensiyä reformasın tormışqa aşıru mäs’äläsendä qararlı buluların äytte.