Putin texnologik cihazlarğa cirle programma quyunı qanunlaştırdı

Rusiyädä üzendä programmalaştırılmağan aqıllı telefon häm sanaqlarnı (komp’yuter) satu tıyıldı. Däwlät başilığı Vladimir Putin şul xaqtağı qanunnı imzaladı. Ul 2020nçe yılnıñ 1nçe iyülennän ğamälgä keräçäk. Şul könnän soñ ildä satıluçı barlıq aqıllı telefon, sanaq häm aqıllı televizorlarda fabrika köyläwe bularaq Rusiyä programmaları torırğa tiyeş. Monı ütämäwçelärgä zur ştraflar kertergä uylıylar.

Qanunnıñ qaysı êşlänmälärne qolaçlıyaçağı häm programmalarnıñ alarğa urnaştırılu prośessı turında xökümät qabat belderäçäk.

Wäqalätlelär fikerençä, älege qanun belän ilneñ İT kompaniyäläre tağın da köndäşlek itärlek xälgä kiläçäk. Monnan tış, qullanuçı xoquqları saqlanaçaq. Qayber belgeçlär isä qanunnıñ Rusiyä İT tarmağında butalçıqlıqlar kiterep çığaraçağın sanıy.

Rusiyädä satıluçı çit il telefonnarında ildä yasalğan êzläw sistemasın häm xäbärläşmä programmaların qullanu êlegräk tä kön üzägenä çıqqan ide. Älege iniśiativanı Yandeks, Mail.ru şikelle rus texnologiyä şirkätläre yaqladı, ämma Apple, Samsung, Huawei qarşı çıqtı.