"Noviçok" isemlekkä kerde

Ximik qorallarnı tıyu oyışması qullanırğa yaramağan matdälär isemlegenä “Noviçok”nı östäde. Uzğan yıl anıñ belän ikele agent Sergey Skripal’ häm anıñ qızı Yuliyanı ağulağannar ide.

Oyışmanıñ yıllıq konferenśiyäse Niderlandnıñ Gaaga şähärendä uzdı. Anda ağulı ximik matdälär isemlegenä üzgäreş kertü öçen Amerika Quşma Ştatları, Niderland häm Kanadadan urtaq häm Rusiyä tarafınnan ayırım täq’dim yasaldı. Alar bertawıştan qabul itelde.

Qarar buyınça, “Noviçok” dip ataluçı ağulı ximik matdälärne qoral bularaq qullanu tıyılaçaq.

Sergey Skripal’ Angliyä tışqı küzläw servisı M16 öçen êşläwe açıqlanğannan soñ Rusiyädä törmägä xökem itelde häm soñınnan agent almaşu belän irekkä çıqtı. Anı qızı Yuliyä belän bergä  Angliyäneñ Solsberi şähärendä ber êskämiyädä añnarın yuğaltqan xäldä taptılar.

Böyekbritaniyä alarnı ağulawda Rusiyä tarafınnan yasap çığarıluı alğa sörelgän, nerv sistemasına täêsir itüçe ximik matdäneñ qullanıluın belderde. Agunıñ Suvetlar berlegendä 1970nçe-1980nçe yıllarda uylap tabılğan “Noviçok” isemle ximik törkemgä kerüe açıqlandı.

Angliyädä başlanğan kampaniyä belän bik küp il 100dän artıq Rusiyä diplomatın kire qaytarıp cibärde.