Berlin divarı cimerelgängä 30 yıl

Germaniyädä Berlin divarın cimerüneñ 30 yıllığı başqalada bilgeläp ütelde.

Tarixi Brandenburg qapqası qarşında oyıştırılğan tantanağa Germaniyä däwlät başlığı Frank-Val’ter Ştaynmayer, kanśler Angela Merkel’, Berlin töbäge prem’yer-ministrı Mixaêl’ Müller kilde. Çarada distälägän meñnärçä keşe qatnaştı.  

Däwlät başlığı Ştaynmayer üzeneñ çığışında xalıqnı qıyu häm tolerant bulırğa çaqırdı. Ul Berlin divarın keşeleksez qorılma bularaq bäyäläde. “Berlin divarı cimerelde, ämma ildä yaña divarlar barlıqqa kilde. Qanäğat’sezlek, açu, näfrät divarları. Çitläşü divarları. Kürenmi torğan, ämma şulay da bülä torğan divarlar. Berdämlegebezneñ qarşında toruçı divarlar,”-dide Ştaynmayer.

Çarada bik küp muzıkal’ törkemnär çığış yasadı.

Êlekkege GDR rejimı 1961nçe yılnıñ 13nçe avgustında Berlinnı häm Germaniyäne bülüçe divar tözede. 1989nçı yılnıñ 9nçı noyabrendä anı cimerdelär. 1990nçı yılnıñ 3nçe oktyabrendä isä ike Germaniyä berläşte.