Paqıstanda cir teträwdä ülüçelär sanı arttı

Paqıstanda kiçä bulğan cir teträwdä ülüçelär sanı 37gä citte. Anıñ üzäge Azad Cammu häm Käşmir töbägeneñ Yaña Mirpur şähärenä turı kilde. Teträw 5,8 ball zurlığında ide.  

Azad Cammu häm Käşmir mäğ’lümat ministrı Müştak Minxas beldergänçä, cir teträw bulğan awıl cirleklärenä xärbi boralaqlar belän barıp citälär. Cimerelgän binalar astınnan çığarılğan mäyet sanı xäzergä 37. Monnan tış, 500dän artıq yaralanuçı bar.

“Qotqaru êşçänlekläre tögällängännän soñ, zararlarnı isäpläw häm yärdäm itü başlanaçaq. Moxtaclar öçen barınaqlar xäzerlänäçäk,”-dide Minxas.

Mirpur mêrı Çaudri Möxämmät Tayyab isä yullarnıñ zarar kürüe arqasında qotqaru êşçänlegeneñ awırlıq belän baruın äytte. Yärdämgä xärbilär kilä. Monnan tış, alar cir teträwdä zarar kürgän êlektr êlemtäse, infrastruktura, mäktäp, xastaxanä häm mäçet şikelle qorılmalarnı torğızuda da qatnaşa.