AQŞ İranğa qarşı koaliśiyä tözemäkçe
Alar Soğud Ğaräbstanındağı şartlawlarğa Tähran idaräseneñ ğayeple buluın sanıy
Amerika Soğud Ğaräbstanınıñ neft’ ob’yektların şartlatu öçen cawaplı sanawçı İranğa qarşı xalıqara koaliśiyä tözergä tırışa. Bu xaqta AQŞnıñ däwlät särqatibe Mayk Pompeo belderde. Ul Saudi Aramkodağı waqıyğalardan soñ Soğud Ğaräbstanı häm Berläşkän Ğaräp Ämirleklärenä bardı.
Pompeo Abu-Dabidan kiteşli oçqıçta jurnalistlarnıñ sorawlarına cawap birde. Ul uzğan atnadağı höcümneñ artında İrannıñ toruına ışanuların tağın ber qat assızıqladı. Pompeo äytkänçä, Tähranğa qarşı yasalaçaq adımnarnı Riyadta da, Abu-Dabida da söyläşkännär.
AQŞ belän İran arasında kileşü mömkinlege xaqındağı sorawğa Pompeo bolay dip cawap birde: “İlbaşı Tramp närsä teläsä, şul bulır. Döresen äytkändä, tınıç çişeleş telibez häm anı kürsätüebezne uylıym. Alar (yäğ’ni İran) Amerikanıñ keşesez hawa apparatın bärep töşerde, xäzer isä ênergetika çığanaqlarına bik zur höcüm oyıştırdılar. Bez isä tınıç koaliśiyä tözergä tırışabız”.
