"Ber telefon belän telägän ilgä kererbez"

AQŞ ilbaşı Donal’d Tramp İranğa tıqşınu ixtimalı turında belderde. “Ber telefon belän telägän ilgä kererbez. Bügen buluı şart tügel. İrtägä bulır, 2 atnadan soñ bulır,”-dide ul.

Tramp Kaliforniyä ştatınıñ Meksika çigendä tözelüçe divarnı barıp qaradı, mondağı prośess xaqında jurnalistlarğa mäğ’lümat birde. Ul älege divar belän kön’yaq çigendäge qanunsız migrant krizisın xäl itäçäklären assızıqlıy. “Monnan soñ keşe kerä almayaçaq,”-di Tramp.

AQŞ ilbaşı İranğa xärbi tıqşınu ixtimalı xaqında da söyläde. “Yaqın Könçığışta nilär bulaçağın alda küräçäkbez. Tıqşınu härwaqıt ciñelder. Ber telefon belän teläsä-qaysı ilgä kerä alabız,”-dip Tramp ikele-mikele uylarğa säbäp birde.

Monnan tış, AQŞ ilbaşı uzğan atnada wazıyfasınnan alınğan Aq Yort milli iminlek kiñäşçese Djon Bolton belän bik küp mäs’älädä urtaq fikergä kilä almawların söyläde. “Bolton şikelle keşelär Ğıyraqqa kerergä teläde häm êşlär uylağan şikelle barmadı. Sazlıqqa kerep battılar. Yaqın Könçığışnıñ poliśiyäse buldıq. Bu qurqınıç närsä,”-dide Tramp.