Yanğan urmannar

İndoneziyada yılnıñ 8 ayında çıqqan urman yanğınnarında yaqınça 330 meñ gektar urman zarar kürde. Bu xaqta ilneñ afätlär belän idarä itü agentlığınnan belderälär.

Ğıynvardan başlap avgust ayına qadär bulğan yanğınnarnıñ kübese Sumatra häm Borneo utrawlarına turı kilä. Kölgä äylängän urmannarnıñ mäydanın iyärçennän töşerep alınğan fotolardan qarap bilgelägännär.

İndoneziyaneñ Riau töbägendä iyül’dän birle däwam itüçe yanğınnarnı sünderü öçen zur tırışlıq quyalar. Monnan tış, tağın berniçä töbäktä utnı kontrol’ astına alu öçen köräş bara.  

Yanğınnarğa may ayınnan sentyabr’gä qadär däwam itüçe qorılıq häm fermerlarnıñ igen cirlären kiñäytü öçen urmannarğa ut törtüe säbäpçe.