Qar börtekläre belän bergä plastik kisäkçeklär dä yawa

Hawadağı plastik kisäkçeklärneñ tabiğıylığı saqlanuçı qotıp töbäklärendä dä qar börteklärenä quşılıp cirgä töşüe açıqlandı.

BBCneñ xäbärenä qarağanda, belgeçlärneñ tikşerenüläre plastik kisäkçeklärneñ här cirdä buluın kürsätä. Xätta sulış alğanda ul keşelärneñ üpkälärenä kerä.

Tikşerenülärdä zurlıqları 5 millimetrdan keçkenä, êçendä rezina, laq, buyaw häm sintetik mamıq êzläre bulğan kisäkçeklärdän ber cirdä dä qaçıp qotılu mömkin bulmawın isbatladılar.  

Belgeçlär törkemendäge doktor Melani Bergmann tikşerenülär waqıtında üsemlek qabıqları, xaywan yonnarı şikelle tabiğıy äyberlär tabarğa ömetlänülären, ämma näticälärneñ bik şaqqattıruın äytte.   

“Qardağı plastik kisäkçeklärneñ kübeseneñ hawadan kilüe açıq kürenä,”-dide ul. Älege matdälärneñ keşe sälamätlegenä yoğıntısın älegä tikşermägännär.

Bergman dön’yada plastik qullanunıñ kiñ cäyelüenä iğ’tibarnı cälep itte. Ul bu mäs’älädä çara kürelü häm al’ternativalar çığaru ähämiyätle buluın assızıqladı.

Plastik kisäkçeklärneñ qotıp töbäklärenä niçek barıp citüe mäs’äläsendä dä tikşerenülär ütkärelä. Älegä alarnıñ atmosferadağı yulçılığı turında tögäl açıqlaw yasalmadı.