"Borılıp közgegä qara"

Norvegiyä xökümäte räise Êrna Solberg Skandinaviyädä rasaçıl törkemnäreneñ üzäge Şveśiyä buluın belderde. Ul üz ileneñ moña qarşı çaralar kürergä tiyeşlegen assızıqladı.

Solberg monı Norvegiyäneñ Barum şähärendä Äl-Nur İslam üzäge mäçetenä oyıştırılğan höcüm belän bäyle bularaq söyläde. Monda anıñ ğayepne başqa ilgä atuınıñ säbäbe bar. Xökümät räise beldergänçä, çiktän tış unçı oyışma “Skandinaviyä qarşılıq xäräkäte”neñ üzäge Şveśiyädä. Ul älege törkemnärneñ Norvegiyägä kilep qırın êşlär başqaruın söyli. Solberg bolarğa qarşı berdäm köräş kiräklegenä basım yasıy.

Norvegiyä xökümäte räiseneñ belderüenä Şveśiyädän bik kisken cawap birdelär. Ênergetika ministrı Anders İgeman, üzeneñ Twitter xisabındağı yazması aşa, aña borılıp közgegä qararğa quştı. Ul Solbergnıñ migrantlarğa qarşı buluı belän tanılğan çiktän tış uñçı Üseş partiyäse belän ike tapqır xökümät tözüen xäterlätte.

Älege mäs’älä xaqında İgeman Şveśiyäneñ iñ zur gazetı “Alfonbaldet”qa da interv’yu birde. “Däwlätlär arasında êkstremizm belän köräştä berdämlek ähämiyätle, läkin sez çiktän tış uñçı partiyä belän xezmättäşlek itep, çiktän tış uñçı qaraşlı säyäsätçe Sil’vi Listxaugqa ministr wazıyfası biräsez ikän, ğayepne üzegezdän êzlärgä kiräk,”-dide ul. Ministr ike rasaçıl höcümçeneñ Norvegiyädän çığuın da xäterlätte. “Şveśiyädäge uñçılarnı ğayepläw döres tügel. 77 keşene ütergän Anders Bexring Breviktäge Üseş partiyäse äğ’zası ide,”-dide ul.   

İsegezgä töşeräbez, Norvegiyäneñ Barum şähärendä şimbä könne qorallı keşe Äl-Nur islam üzäge mäçetenä höcüm itte. Waqıyğada 1 keşe yaralandı. Şöbhäle saq astına alındı.