Soğud Ğaräbstanında güzäl zatlarnıñ irekläre kübäyä

Soğud Ğaräbstanında xatın-qızlarğa qarata qayber çikläwlär beterelde. Alarğa passport yasatu häm çit ilgä çığu öçen yaqınnarınnan röxsät alu şartı ğamäldän çığarıldı. Tözätmä patşa tarafınnan imzalandı häm räsmi gazetlarda basıldı.  

Soğud Ğaräbstanında xatın-qızlar häm 21 yäşennän keçkenä ir-atlar äti-änise yäisä başqa yaqınınıñ röxsätennän başqa passport yasata häm çit ilgä çığa almıy ide. Tözätmä güzäl zatlarğa ir-atlarnıqı şikelle ük xoquq tanıy.

Monnan tış, ğailä xäle mäs’äläsendä dä üzgäreş bar. Kiyäwdäge xatın-qıznıñ yäşäw urını ireneke şikelle ük bulırğa tiyeş digän qanun da beterelde.

Şul uq qısalarda, xatın-qızlarğa tuu, öyläneşü häm ayırılışu tanıqlıqları häm räsmi ğailä dokumentların yasata alu mömkinlege birelde.  

Êşläw xoquqınıñ cenes, sälamätlek torışı yäisä yäş’kä qaramıyça böten keşene üz êçenä aluı qararlaştırıldı. Layıqlı yalğa çığu yäşe xatın-qızlarda da, ir-atlarda da bertösle buldı - 58. Monnan alda irlär 60ta, xatın-qızlar 55 yäş’tä êştän kitä ide.

Bu üzgäreşlärneñ Soğud Ğaräbstanı xatın-qızlarnıñ xaqları mäs’äläsendä keşe xoquqları oyışmaları tarafınnan tänqıyt’längännän soñ kertelüe belderelä.