Bolgariyä ilbaşı F-16larğa veto quydı
Rumen Radev älege oçqıçlarnı satıp aludan baş tartu yaqlı
1241269
Bolgariyä ilbaşı Rumen Radev AQŞtan 1 milliard 200 million dollarlıq 8 danä “F-16 Blok 70” tibındağı xärbi oçqıçlarnı alu turındağı kileşügä, parlamentnıñ uñaylawına qaramastan, veto quydı.
Radev êlek Bolgariyä hawa köçläre komandirı ide. Ul parlamentqa cibärgän vetonıñ säbäbe itep ilneñ bu oçqıçlarnı alıp küp yıllıq burıçqa batacağın kürsätä. Monnan tış, Rumen Radev beldergänçä, satıp alu parametrları mäs’äläsendä milli kileşü täêmin itelmägän häm bu zur borçu tudıra. Östäwenä alınaçaq oçqıçlarnıñ qorallanu häm cihazlanuı citärlek tügel, monı tögälläw östämä çığımnarğa kiteräçäk.
Bolgariyä ilbaşınıñ vetosınnan soñ kileşü belän bäyle qarar parlamentta qabat qaralıp tawışqa quyılaçaq.
