Soğud Ğaräbstanı prinśessasına qulğa alu yanıy

Soğud Ğaräbstanı patşası Sälman bin Abdülaziznıñ qızı prinśessa Xassa bin Sälmanğa törmä belän yanıylar. Ul Franśiyä başqalası Parijdağı öendä tözekländerü êşläre başqaruçı santexniknı tän saqçıları tarafınnan qıynattıra.

Franśiyä matbuğatında çıqqan xäbärlärgä qarağanda, Parij cäza mäxkämäse prokurorı Xassa bin Sälmannı 6 ayğa şartlı räweştä iregennän mäxrüm itü häm 5 meñ yevro ştraf tülätterü taläp itä. Santexniknı qıynağan tän saqçısına da 8 ay şartlı räweştä iregennän mäxrüm itelü yanıy.

Bu waqıyğağa inde 3 yıl, ämma êş äle genä qarala başladı. Mäxkämä utırışı 12nçe sentyabr’gä bilgelängän. Xassa bin Sälmannı bolay da inde 2017nçe yılnıñ dekabr’ ayınnan birle törle ğayepläwlärdän qulğa alu qararı bar. Ul xäzer Franśiyädän Soğud Ğaräbstanına qaçtı.

Qıynalğan santexniknıñ 5 kön êşkä çığa almawı bilgele. Soğud Ğaräbstanı täxet prinśı Möxämmät bin Sälmannıñ qız tuğanı Xassa bin Sälman ğayepläwlärne kire qağa. Santexniknıñ poliśiyägä birgän ğarizasında prinśessanıñ qıynawçılarğa: “Bu êtne üterergä kiräk, yäşärgä layıq tügel,”-diyüe dä yazılğan.