Greśiyädä qurqınıç dawıl

Greśiyädä köçle yañğır, boz häm dawıl. Nätyicädä 6 turistnıñ ğomere özelde, 108 keşe yaralandı. 4seneñ xäle ayıruça awır.

Däwlät telekanalı ERT citkergän mäğ’lümatlarğa qarağanda, dawıl ilneñ tön’yağına tağın da qatıraq bärgän. Bigräk tä turistik cirlek Xalkidikidä anıñ täêsire awır ide. Dawıl anda ülem häm matdi zıyanğa säbäpçe buldı.

Saloniki tiräsendä bulğan tabiğıy afättä 6 keşeneñ ğomere özelde, alarnıñ ikese bala. Ülüçelärneñ barısı da turist: alar Çexiyä, Rumıniyä häm Rusiyädän kilgän.  

Cirlektä ğadättän tış xäl iğ’lan itelde. Töbäkkä küp sanda yanğın sünderü häm qotqaru törkemnäre kiterelde.

Yaña cämäğat’çelek iminlege ministrı Mixalis Xrisodoidis ğomere özelüçelär öçen qayğı urtaqlaştı. “Töbäktä su basu tügel, ağaçlarnı yıqqan köçle dawıl bar ide. Keşelärneñ ülemenä şul säbäpçe buldı,”-dide ul.

Grek matbuğat çaralarınıñ xäbärenä qarağanda, ber restorannıñ tübäse işelep rumıniyäle 8 yäş’lek bala häm änise ülä. 54 yäş’lek rus keşese häm anıñ ike yäş’lek ulı yığılğan ağaç astında qalıp can birä. Çexiyädän kilgän ğailäneñ ike äğ’zası isä karavannarın cil äyländerep atu arqasında hälaq bula.