Liviyädäge AQŞ qoralları bäxäs quptardı

AQŞ senatı tışqı mönäsäbätlär komitetı ilneñ Berläşkän Ğaräp Ämirleklärenä satqan qorallarınıñ Liviyädä Xalifä Xafterğa bäyle köçlärneñ qulında buluı belän bäyle tikşerü başlanuın taläp itte. Komitetnıñ iñ yuğarı däräcäle demokrat äğ’zası Bob Menendes AQŞ däwlät särqatibe Mayk Pompeoğa bu xaqta xat yazdı. Ul Liviyädä açıqlanğan Amerika qoralları turında “Ägär bu farazlar döres bulıp çıqsa, qanun buyınça, Berläşkän Ğaräp Ämirleklärenä barlıq qoral satışın tuqtatu kiräklegen beläsezder,”-dip yaza.   

Bob Menendes AQŞnıñ Ämirleklärgä satqan qorallarınıñ Liviyädä qullanıluınıñ monıñ belän bäyle Amerika qanunın açıqtan-açıq bozuın häm BMOnıñ Liviyädäge qoral êmbargosına qarşı kilüen belderde. Ul bu wäzğıyät’neñ Ştatlar idaräse tarafınnan tikşerelep açıqlıq kertelüeneñ mäcbüri buluın assızıqlıy. Senator komitet qısalarında kiräkle kereşülär yasalaçağın belderde.  

İsegezgä töşeräbez, Liviyädağı Milli kileşü xökümäte Giryan şähärendä Xalifä Xafternıñ qoralların qulğa töşerde häm alarnıñ Amerikada êşlängän buluı açıqlandı.

Donal’d Tramp idaräse aldağı atnada, Kongressnı sanğa suqmıyça, Soğud Ğaräbstanı häm Berläşkän Ğaräp Ämirleklärenä 8 milliard dollarlıq qoral satu kileşüen raslayaçağın beldergän ide.